La banda xixonesa Sambre ta acabante espublizar el so primer discu, tituláu Na solombra y que contién once temes. Ye tamién una de les primeres ediciones discográfiques musicales d’Algamar Producciones.

Sambre, palabra asturiana que significa daqué asina como pena, tristura, ye tamién el nome d’un grupu de Xixón creáu a principios del 2007 cola intención de reflexar les influencies musicales de los sos miembros, garrando de base’l rock y escoyendo la llingua asturiana como forma d’espresión. Hasta la grabacion d’esti discu participaren nel discu de versiones de Dixebra Perversiones col tema «Asturcón» y nel recopilatoriu Calzada News vol. 2 con «Atravesáu pelos chigres».

Na solombra ye un discu fundamentalmente de rock’n’roll con infuencia del folk, onde les guitarres eléctriques y la distorsión comparten espaciu con instrumentos acústicos como’l violín, la gaita o la mandolina. Temáticamente les lletres van del amor y la folixa a les vivencies personales o la vida na cai. La producción tuvo a cargu de Xel Pereda, componente de Llan de Cubel y Lucas 15.

Sambre son: Hugo Fuente (voz), Gabriel Méndez (baxu), Daniel Sánchez (batería), Raul Lopez (guitarra), Jose Luis Fernández (guitarra) y Xuan Naveiras (gaita) -Por Xuanel